Pandakot

Dust Pan

Ang katambal ng walis sa paglilinis ng mga kalat sa loob at labas ng bahay ay ang pandakot o dust pan. 

Bunot

Coconut Husk Floor Polisher

Ang bunot ay pampakintab ng sahig na mula sa bunot o husk ng niyog. Ito ay mainam gamitin na may kasamang floor wax sa mga sahig na yari sa kahoy o semento.

Walis Tambo

Native Filipino Whisk Broom

Ang walis tambo ay isang uri ng malambot na walis na gawa sa mga talahib ng tambo. Epektibo itong panlinis sa sahig ng bahay yari man sa kahoy o semento.

Walis Tingting

Filipino native outdoor broom.

Ang walis tingting ay isang uri ng native na walis  na gawa sa matigas na gitnang bahagi ng dahon ng niyog. Kalimitan itong ginagamit para linisin ang bakuran o ano mang parte ng labas ng kabahayan.

Tinatanggal muna ang mga dahon ng niyog sa sanga nito at pagkatapos ay aalisin na ang mga hibla ng malambot na bahagi ng mga dahon. Ang mga matitigas na bahagi ay titipunin at bubugkutin para maging walis.

Kudkuran ng Niyog

Bugtong: "Baboy ko sa Sorsogon, kung hindi sakya'y di lalamon."

Native coconut grater.

Ang kudkuran ay isang sinaunang kasangkapan na gamit sa manu-manong pagkudkod ng niyog. Meron itong bakal na 'mga ngipin' na tagakudkod. Dahil pangkaraniwan sa mga Pilipino ang mga lutuin na may gata, kalimitang may kudkuran na makikita sa mga kusina noong unang panahon.

Puto Maya

Ang Puto Maya ay isang uri ng kakanin na gawa sa malagkit na isinaing sa gata ng niyog. Ito ang pangunahing inihahain sa mga painitan katerno ang tsokolate o sikwate sa Bisaya-inuming gawa sa purong  tableya (sari naman ang tawag kapag may halong gatas evaporada). 

Sa unang tingin ay mas nalalapit ito sa biko kaysa puto kaya marahil tinawag na "gaya-gaya, puto maya" ang isang taong mahilig mangopya pero hindi naman lubos na magawa.*

*source

Binagol

Ang Binagol ay isang native delicacy na mula sa kabisayaan, partikular sa Samar at Leyte. Ito ay ginawa mula sa ginadgad na gabi o taro tubers, malagkit at dinikdik na mani. Mayroon din itong minatamis na pampuno na gawa sa gata, pula ng itlog at gatas kondensada. Tinawag itong binagol mula sa salitang 'bagol' o bao ng niyog sa Tagalog dahil nakahulma at nakalagay ito sa bao ng niyog. Nababalot ito sa dahon ng saging at nakatali gamit ang pisi kaya naman tila isang regalo ito kapag iyong bubuksan.

Banga

Ang banga ang tradisyonal na sisidlan ng tubig na inumin na kadalasang makikita sa banggera noong unang panahon. Ito ay yari sa luwad at bahagyang mas maliit kaysa tapayan.

Kalan de Uling

Kadalasang yari sa luwad, ang kalan de uling ang tradisyonal na gamit sa pagluluto katambal ng palayok at native na sandok.

Almires

Tinatawag ring pandikdik, ang almires ang ginagamit na pandurog ng mga sangkap tulad ng paminta o bawang na kailangang ihalo sa pagkain. Ito rin ang ginagamit kung kailangan noon ng ating lolo at lola na makuha ang katas ng mga dahon na nakagagamot.

Saging na Saba

Katutubo sa ating bansa ang saging na saba. Maraming lutuin mula rito ang kinamulatan na natin. Una na riyan ang banana que na sikat na meryenda saan ka man mapuntang baranggay dito sa Pilipinas. Nariyan din ang turon, maruya at minatamis na saging. Pwede itong ilaga lamang nang simple o gawing nilupak na lubhang kumplikadong likhain noong araw gamit ang tradisyonal na pambayo. Hinahalo din ito sa ginataang bilo-bilo, sa halo-halo o maging sa ulam tulad ng nilagang karne at pochero. Tunay na nakatagni na sa kultura at panlasa natin ang lokal na prutas na ito.

Kutsinta

Sinasabing ang salitang 'Kutsinta' ay nagmula sa salitang Tsino na 'Kueh Tsin Tao'. Ang salitang 'Kueh' sa wikang Hokkien ay nangangahulugan ng isang maliit na steamed cookie na panghimagas. 

Isang uri ng puto ngunit tila jelly ang texture dahil sa sangkap nitong lihiya, ang puto kutsinta ay meryendang nakagisnan na nating mga Pinoy at makikita saan mang dako dito sa ating bansa. Madalas ibinibenta ito na may kasamang ginadgad na niyog para ibudbod sa ibabaw at karaniwan na rin itong itinatambal sa puto.

Puto

Steamed Rice Cake

Ang tradisyonal na puto ay likha sa galapong na niluto sa pamamagitan ng pag-steam. Sa ngayon karaniwan na rin ang paggamit ng harina sa pagluluto nito.

Dahil sa pagiging malikhain ng mga Pinoy marami na ang umusbong na uri ng puto. Tanyag na diyan ang Cheese Puto na nilalagyan ng keso sa ibabaw, merong Puto Pao na nilalagyan ng asado sa loob bilang palaman nito na kahalintulad ng siopao at meron na ring Puto Flan na pinagsamang puto at leche flan. At para lalong maging makulay ang handaan ay nilalagyan din ito ng food coloring.